कोइराला परिवारबीच भेटवार्ता, महाधिवेशनमा एकढिक्का भएर जाने समझदारी

काठमाडौं । नेपाली कांग्रेसका वरिष्ठ तीन नेता नेताहरुबीच भेटवार्ता भएको छ । पार्टी महाधिवेशनको संघारमा रहेको बेला कोइराला परिवारका तीन वरिष्ठ नेताहरुबीच भेटवार्ता भएको हो । कांग्रेसका महामन्त्री डा. संशाक, नेता शेखर र नेतृ सुजाता कोइरालाबीच आज भेटवार्ता भएको हो ।

भेटवार्ता नितान्त पारिवारिक भएको संशाक कोइरालाका स्वकीय सचिव भरत तिवारीले जानकारी दिनु भयो । तिवारीका अनुसार भेटघाटको अवसरमा नजिकिंदै गरेको महाधिवेशन, नेतृत्व तथा सरकारलगायतका राजनीतिक विषयमा छलफल भएको छ ।

पार्टीलाई एकजुट बनाएर लग्ने र भेटघाटलाई बाक्लो बनाउने पनि उहाँहरुबीच समझदारी भएको छ । साथै अबको पार्टी महाधिवेशनमा एकढिक्का भएर जाने, त्यसको नेतृत्व कोइराला परिवारले नै गर्नुपर्नेमा पनि एकमत देखिनु भएको छ । पार्टीको नेतृत्वमा सरकार बनेको र पार्टी महाधिवेशन नजिकिंदै गर्दा भएको यो भेटलाई अर्थपूर्ण रुपमा हेरिएको छ ।